ເວົ້າເລື່ອງການຮຽນ ແນ່ນອນວ່າມີຫຼາກຫຼາຍ ບວກກັບຄົນເຮົາທີ່ມີຄວາມຄິດແຕກຕ່າງກັນ ເບິ່ງຄົນລະມຸມ, ດັ່ງນັ້ນ ມຸມມອງທີ່ເບິ່ງທີ່ຄິດກ່ຽວກັບເລື່ອງການຮຽນມັນຍ້ອມຕ່າງກັນແນ່ນອນ.
ການຮຽນ ບໍ່ໄດ້ມີຂໍ້ກໍານົດກົດເກນຕາຍຕົວວ່າ ໃຜຮຽນຈະປະສົບຄວາມສໍາເລັດໃນຊີວິດ ແລະ ກໍ່ບໍ່ມີຂໍ້ກໍານົດໃດທີ່ບອກວ່າຫາກບໍ່ຮຽນຈະປະສົບຄວາມສໍາເລັດບໍ່ໄດ້.
ອີກຢ່າງ ການຮຽນກໍ່ມີຫຼາຍແບບ ບາງຄົນຮຽນພໍໃຫ້ຮູ້ ແຕ່ບໍ່ໄດ້ຫວັງເອົາມາໃຊ້ ເປັນໂຕກໍານົດຊີວິດ ມີຫຼາກຫຼາຍຄົນທີ່ຮຽນຈົບແລ້ວກໍ່ອອກມາເຮັດທຸລະກິດສ່ວນຕົວ, ກັບບ້ານເກີດເມືອງນອນ ກັບໄປໃຊ້ຊີວິດຕາມແບບເສດຖະກິດພໍພຽງ ປູກຝັງລ້ຽງສັດ ເຮັດໄຮ່ນາຮົ້ວສວນລ້ຽງຄອບຄົວ.
ແຕ່ກໍ່ປະຕິເສດບໍ່ໄດ້ວ່າມີຄົນບໍ່ໜ້ອຍ ທີ່ຍຶດຖືເອົາການຮຽນ ຫຼື ສາຍວິຊາຊີບທີ່ຕົນເອງຈົບ ມາເປັນຕົວຕັ້ງວ່າຕ້ອງໄດ້ເຮັດວຽກທີ່ກ່ຽວຂ້ອງ ເພື່ອນໍາພາຊີວິດຕົນສູ່ເປົ້າໝາຍ ຮອດຈຸດສູງສຸດຂອງຊີວິດ.
ມື້ນີ້ ແອັດມິນມີເລື່ອງລາວຫຼັງຮຽນຈົບຂອງນັກສຶກສາທ່ານໜຶ່ງມາຝາກ, ຜູ້ກ່ຽວຮຽນຈົບ ແລະ ກັບບ້ານໄປໃຊ້ຊີວິດແບບຊາວໄຮ່ຊາວນາ ອາໄສລ້ຽງສັດເປັນອາຊີບ ແລະ ຍັງໄດ້ໂພສຮູບພ້ອມຂໍ້ຄວາມລົງເຟສບຸກ ອວດອາຊີບຂອງຕົນເອງໃນປັດຈຸບັນນີ້.
ໂດຍຜູ້ໃຊ້ເຟສບຸກຊື່ Aib Pov ໄດ້ບັນຍາຍພາບນີ້ໄວ້ວ່າ: ປະລິນຍາລູກຊາວນາສຸດທ້າຍຮຽນຈົບມາກໍ່ມາລ້ຽງງົວ ແລະ ຄວາຍຄືເກົ່າ, ເສຍໄປລ້າໆ 84.000.000 ກີບ ຮຽນ 4 ປີຢູ່ ມຊ ເພາະຮຽນຈົບບໍ່ຖືກສາຍ.
ແນວໃດກໍ່ຕາມ ແອັດຄິດວ່າ ທຸກຄົນສາມາດເລືອກອາຊີບໄດ້ ບໍ່ວ່າຈະຮຽນຈົບຫຍັງ ຫຼື ແມ້ກະທັ້ງຮຽນບໍ່ຈົບ ຫຼື ບໍ່ໄດ້ຮຽນ ກໍ່ສາມາດເລືອກຊີວິດ ເລືອກທາງເດີນຂອງຕົນເອງໄດ້.
