ຮອງນາຍົກລັດຖະມົນຕີ ເນັ້ນບໍ່ໃຫ້ການຂົນສົ່ງສິນຄ້າຢູ່ດ່ານສາກົນຂົວມິດຕະພາບ ແຫ່ງທີ I ເປັນຈຸດແພ່ເຊື້ອ.
ຂປລ. ໃນວັນທີ 24 ເມສາ 2021, ທ່ານ ສອນໄຊ ສີພັນດອນ ຮອງນາຍົກ ລັດ ຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ໄດ້ລົງຢ້ຽມຢາມ ແລະ ຊີ້ນຳວຽກງານຕ້ານພະຍາດໂຄວິດ-19 ຢູ່ດ່ານສາກົນຂົວມິດຕະພາບແຫ່ງທີ I ເພື່ອປຶກສາຫາລືໃນການຮັບປະກັນບໍ່ໃຫ້ການຂົນສົ່ງສິນຄ້າ ເປັນຈຸດໃນການລະບາດຂອງພະ ຍາດໂຄວິດ-19,
ສະນັ້ນລະບຽບການຂອງຄະນະສະເພາະກິດທັງສູນກາງ ແລະ ທ້ອງຖິ່ນ ແລະ ຜູ້ປະກອບການທີ່ນຳເຂົ້າ-ສົ່ງອອກສິນຄ້າແມ່ນຕ້ອງໃຫ້ຈອດກັນ.ທ່ານ ສອນໄຊ ສີພັນດອນ ໄດ້ກ່າວວ່າ: ໃນຄຳສັ່ງເລກທີ15/ນຍ ໃຫ້ຢຸດຕິຊົ່ວຄາວ ການຂົນສົ່ງໂດຍສານທາງນໍ້າ ລະຫວ່າງ ນະຄອນຫລວງວຽງຈັນ ຫາ ບັນດາແຂວງ, ແຂວງ ຫານະຄອນຫລວງວຽງຈັນ ແລະ ລະຫວ່າງ ແຂວງ ຫາ ແຂວງ; ໃຫ້ຢຸດຕິຊົ່ວຄາວ ການຂົນສົ່ງໂດຍສານທາງອາກາດ ພາຍໃນປະເທດທຸກເສັ້ນບິນ,
ຍົກເວັ້ນຖ້ຽວບິນພິເສດທີ່ໄດ້ຮັບອະນຸຍາດຈາກຄະນະສະເພາະກິດ ໄປຮັບຜູ້ໂດຍສານທີ່ມີພູມລໍາເນົາ ເຮັດວຽກປະຈໍາ ຢູ່ນະຄອນຫລວງວຽງຈັນ; ໃຫ້ຢຸດຕິຊົ່ວຄາວ ການຂົນສົ່ງໂດຍສານທາງບົກ ລະຫວ່າງ ນະຄອນຫຼວງວຽງຈັນ ຫາ ບັນດາແຂວງ,ແຂວງ ຫາ ນະຄອນຫລວງວຽງຈັນ ແລະ ລະຫວ່າງ ແຂວງ ຫາ ແຂວງ, ແລະ ການຂົນສົ່ງໂດຍສານ ພາຍໃນແຂວງ ແລະ ພາຍໃນນະຄອນຫລວງວຽງຈັນ, ເຊິ່ງລວມມີ ລົດເມ, ລົດຕູ້, ລົດແທກຊີ, ລົດສອງແຖວ, ລົດຕຸກໆ, ລົດຈໍາໂບ້ ແລະ ລົດຈັກຮັບຈ້າງ; ໃຫ້ຢຸດຕິຊົ່ວຄາວ ການຂົນສົ່ງໂດຍສານ ທາງລົດໄຟ ລາວ-ໄທ.
ສໍາລັບການຂົນສົ່ງສິນຄ້າ ແມ່ນຍັງອະນຸຍາດໃຫ້ສືບຕໍ່ບໍລິການໄດ້ ໂດຍໃຫ້ປະຕິບັດມາດຕະການ ທີ່ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ວາງອອກ ແລະ ບັນດາມາດຕະການຂອງທັງສອງຝ່າຍ ຕົກລົງເປັນເອກະພາບກັນ ຢ່າງເຂັ້ມງວດ; ອະນຸຍາດໃຫ້ມີການຂົນສົ່ງສິນຄ້າພາຍໃນປະເທດ, ລະຫວ່າງປະເທດ, ຜ່ານແດນ ແລະ ນໍາເຂົ້າເພື່ອສົ່ງອອກ ເຊິ່ງເຄື່ອງອຸປະໂພກ-ບໍລິໂພກ ສ່ວນໃຫຍ່ແລ້ວ ແມ່ນນຳເຂົ້າຈາກປະເທດເພື່ອນບ້ານ, ນັບທັງນ້ຳມັນເຊື້ອໄຟ ແລະ ວັດສະດຸກໍ່ສ້າງຕ່າງໆ ເຊິ່ງພວກເຮົາຕ້ອງໄດ້ປຶກສາຫາລືກັນໃຫ້ສະດວກ ແລະ ມີຄວາມສອດຄ່ອງກັບສະພາບຕົວຈິງ; ພ້ອມນີ້ ໃຫ້ເອົາໃຈໃສ່ໃນການປ່ຽນຖ່າຍສິນຄ້າ ແລະ ຄວບຄຸມຄົນຂັບລົດບັນທຸກສິນຄ້າ ໃຫ້ມີຄວາມປອດໄພ ປາສະຈາກເຊື້ອ ເພື່ອຮັບປະກັນ ໃນການຄວບຄຸມ, ປ້ອງກັນ ແລະ ສະກັດກັ້ນພະຍາດໂຄວິດ-19.ຂ່າວ-ພາບ: ສົມຫວັງ
