ສຳນັກຂ່າວຊິນຮວາ ລາຍງານວ່າ: ທ່ານ ກົວ ຊູຈຸ້ນ ຮອງຫົວໜ້າກົມເສດຖະກິດຕ່າງປະເທດ ກະຊວງການຕ່າງປະເທດ ແຫ່ງ ສປ ຈີນ ເປີດເຜີຍວ່າ: ຈີນ ກຽມຈັດສົ່ງວັກແຊັງປ້ອງກັນໂຄວິດ – 19 ໃຫ້ແກ່ 100 ກວ່າປະເທດທົ່ວໂລກ ເຊິ່ງຄິດເປັນສັດສ່ວນກວມເອົາ 1/6 ຂອງການຜະລິດວັກແຊັງປ້ອງກັນໂຄວິດ – 19 ໃນຂະນະນີ້, ພ້ອມສະໜັບສະໜູນປະເທດກຳລັງພັດທະນາຜະລິດວັກແຊັງ ເພື່ອເຮັດໃຫ້ປະຊາຊົນທົ່ວໂລກເຂົ້າເຖິງວັກແຊັງຫຼາຍຂຶ້ນ.
ທ່ານ ກົວ ກ່າວອີກວ່າ: ໃນໄລຍະຜ່ານມາ ສປ ຈີນ ໄດ້ຊ່ວຍເຫຼືອວັກແຊັງໃຫ້ແກ່ຫຼາຍປະເທດ, ພ້ອມກ່າວຢ້ຳວ່າ ຈີນ ຕໍ່ຕ້ານລັດທິ “ ວັກແຊັງຊາດນິຍົມ ” ( Vaccine Nationalism ) ຫຼື ການທີ່ຫຼາຍປະເທດອອກກົດໝາຍຄວບຄຸມການສົ່ງອອກວັກແຊັງ ເພື່ອໃຫ້ວັກແຊັງພຽງພໍຕໍ່ການຊົມໃຊ້ພາຍໃນກ່ອນ ເພື່ອສ້າງຄວາມໄດ້ປຽບດ້ານເສດຖະກິດ.
ສ່ວນວັກແຊັງຂອງຈີນ ໄດ້ຮ່ວມມືກັບບໍລິສັດຜູ້ຜະລິດວັກແຊັງຈາກຕ່າງປະເທດ ເຊັ່ນ: ສະຫະລັດອາຣັບເອເມເຣັດ, ອິນໂດເນເຊຍ, ມາເລເຊຍ, ເອຢິບ, ບຣາຊິນ, ຕວັກກີ, ປາກິດສະຖານ ແລະ ເມັກຊິກໂກ ໂດຍມີກຳລັງການຜະລິດ 200 ລ້ານໂດສ.
ໃນ 140 ປະເທດທົ່ວໂລກທີ່ໄດ້ເຊັນຂໍ້ຕົກລົງຮ່ວມມືຕາມຍຸດທະສາດ ໜຶ່ງແລວ ໜຶ່ງເສັ້ນທາງ ( Belt and Road ) ນັ້ນ ຈີນໄດ້ສົ່ງມອບວັກແຊັງປ້ອງກັນໂຄວິດ – 19 ໃຫ້ແກ່ 84 ປະເທດ ຕາມການຮຽກຮ້ອງຂອງປະເທດເຫຼົ່ານັ້ນແລ້ວ.
ໃນອະນາຄົດອັນໃກ້ນີ້ ຈີນ ຈະເດີນໜ້າປະສານງານກັບທຸກພາກສ່ວນ ເພື່ອຍົກລະດັບການຮ່ວມມືດ້ານວັກແຊັງ ເຮັດໃຫ້ປະເທດກຳລັງພັດທະນາ ສາມາດເຂົ້າເຖິງວັກແຊັງ ເພື່ອຕໍ່ສູ້ກັບພະຍາດໂຄວິດ – 19 ແລະ ຊ່ວຍສະໜັບສະໜູນການຟື້ນຕົວຂອງເສດຖະກິດ.
