ຕໍາຫຼວດລາດຕະເວນທາງນໍ້າປະຈໍາສູນປະສານງານລາວ-ຈີນ ໄດ້ຮັບໃບຍ້ອງຍໍສັນລະເສີນ
ໃນວັນທີ 15 ກໍລະກົດ 2021ນີ້, ທີ່ສູນປະສານງານລາວ-ຈີນບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ຈັດພິທີມອບໃບຍ້ອງຍໍສັນລະເສີນໃຫ້ແກ່ເຈົ້າໜ້າທີ່ຝ່າຍຈີນ ແລະ ພາກສ່ວນວິຊາການ ຜູ້ທີ່ມີຜົນງານດີເດັ່ນ ປະຕິບັດໜ້າທີ່ຢູ່ສູນປະສານງານບ້ານມອມ. ໂດຍພາຍໃຕ້ການເປັນປະທານຂອງ ສະຫາຍ ພັນໂທ ຄຳສອນ ໄຊຍະວົງ ຄະນະປະຈຳພັກກອງບັນຊາການ ຫົວໜ້າຫ້ອງການເມືອງກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນໂທ ຈາງສິ່ງສົ່ງ ຫົວໜ້າສູນປະສານງານບ້ານມອມ ຝ່າຍຈີນ ມີຄະນະພັກ – ຄະນະບັນຊາ 5 ຫ້ອງ ຕະຫຼອດຮອດ ພະນັກງານ ແລະ ວິຊາການ ຝ່າຍຈີນເຂົ້າຮ່ວມຢ່າງພ້ອມພຽງ.
ສະຫາຍພັນໂທ ບຸນທອງ ອິນແກ້ວ ຫົວໜ້າພະແນກນະໂຍບາຍກອງບັນຊາການທະຫານແຂວງ ບໍ່ແກ້ວ ໄດ້ຂຶ້ນຜ່ານຂໍ້ຕົກລົງຂອງກອງບັນຊາການທະຫານແຂວງ ສະບັບເລກທີ 1438/ກທຂ-ບກ ລົງວັນທີ 07 ກໍລະກົດ 2021 ວ່າດ້ວຍການຍ້ອງຍໍສັນລະເສີນ ເຈົ້າໜ້າທີ່ຝ່າຍຈີນ ແລະ ພາກສ່ວນວິຊາການ ຜູ້ທີ່ມີຜົນງານດີເດັ່ນ ປະຕິບັດໜ້າທີ່ຢູ່ສູນປະສານງານບ້ານມອມ ອີງຕາມຂໍ້ກຳນົດຂອງກົມນະໂຍບາຍກົມໃຫຍ່ກ່ນເມືອງກອງທັບ ປະຊາຊົນລາວ ວ່າດ້ວຍການຍ້ອງຍໍສັນລະເສີນ ເຈົ້າໜ້າທີ່ຝ່າຍຈີນ ດັ່ງນັ້ນທາງກອງບັນຊາການທະຫານແຂວງ ຕົງລົງມອບໃບຍ້ອງຍໍ ຈໍານວນ 24 ສະຫາຍ ເປັນກຽດຂຶ້ນມອບຂອງ ສະຫາຍ ພັນໂທ ຄຳສອນ ໄຊຍະວົງ ຄະນະປະຈຳພັກກອງບັນຊາການ ຫົວໜ້າຫ້ອງການເມືອງກອງບັນຊາການທະຫານແຂວງບໍ່ແກ້ວຢ່າງສົມກຽດ.
