ທ່ານ ນາງ ບົວເທບ ພູມິນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ, ທັງເປັນຜູ້ຮັບຜິດຊອບວຽກງານຄຸ້ມຄອງກໍລະນີຕິດເຊື້ອໂຄວິດ-19 ໃຫ້ຮູ້ໃນວັນທີ 16 ກໍລະກົດ 2021 ນີ້ວ່າ: ປັດຈຸບັນ ສປປ ລາວ ມີຜູ້ຕິດເຊື້ອໂຄວິດ-19 ສະສົມທັງໝົດ 3.187 ຄົນ, ພວມປິ່ນປົວ 1.008 ຄົນ,
ປິ່ນປົວຫາຍດີ 2.175 ຄົນ ແລະ ເສຍຊີວິດ 4 ຄົນ. ສຳລັບສະຖານທີ່ປິ່ນປົວຢູ່ໃນນະຄອນຫລວງວຽງຈັນປັດຈຸບັນມີ 3 ແຫ່ງຄື: ໂຮງໝໍມິດຕະພາບ 150 ຕຽງ ແມ່ນປິ່ນປົວຜູ້ທີ່ມີອາການປານກາງ-ໜັກ, ໂຮງໝໍ ເຊດຖາທິຣາດ ແມ່ນຜູ້ທີ່ມີອາການປານກາງ ແລະ ໂຮງໝໍ 103 ກອງທັບ ແມ່ນຜູ້ທີ່ມີອາການເບົາບາງ.
ການຕິດເຊື້ອຢູ່ໃນປະເທດເຮົາດຽວນີ້ສ່ວນຫລາຍແມ່ນເປັນແຮງງານທີ່ເດີນທາງມາຈາກປະເທດໃກ້ຄຽງ, ໂດຍການວິເຄາະການຕິດເຊື້ອ 90% ຂອງແຮງງານນຳເຂົ້າແມ່ນເປັນສາຍພັນເດລຕາ ເຊິ່ງອາການຜູ້ຕິດເຊື້ອຈະບໍ່ສະແດງອາການ ແຕ່ພໍມາກວດວິເຄາະຫາເຊື້ອແລ້ວຜົນກວດອອກມາເປັນບວກ (ຕິດເຊື້ອ) ແລະ ສາມາດຕິດຕໍ່ກັນໄດ້ໄວກວ່າເກົ່າສາຍພັນເດີມ.
