ຮ່ວມເປັນກຳລັງໃຈໃຫ້ນັກກີລາລາວໃນງານມະຫະກຳກີລາໂອແລັມປິກ ຄັ້ງທີ 32 ທີ່ຈັດຂຶ້ນຢ່າງເປັນທາງການ ໃນວັນທີ 23 ກໍລະກົດ ທີ່ນະຄອນໂຕກຽວ, ປະເທດຍີ່ປຸ່ນ.
ການເຂົ້າຮ່ວມງານກີລາໂອແລັມປິກສາກົນຄັ້ງນີ້ ສປປ ລາວ ສົ່ງນັກກີລາເຂົ້າຮ່ວມທັງໝົດ 5 ຄົນ ມີ 3 ປະເພດກີລາ, ສະເພາະ 4 ຄົນຈະເຂົ້າຮ່ວມໂອແລັມປິກຄົນທົ່ວໄປ ແລະ 1 ຄົນຈະເຂົ້າຮ່ວມພາຣາແລັມປິກ (ໂອແລັມປິກຄົນພິການ) ປະກອບໂອແລັມປິກລະດູຮ້ອນບຸກຄົນທົ່ວໄປຄັ້ງທີ 32 ມີຄື: ກີລາແລ່ນ-ລານ 1 ຄົນ ນາງ ສິລິນາ ພະອາໄພ ລາຍການແລ່ນ 100 ແມັດ; ກີລາລອຍນໍ້າ 2 ຄົນ ນາງ ສີຣິອາລຸນ ບຸດຈະເລີນ ລາຍການ 50 ແມັດ ຟຣີສະຕາຍ, ທ້າວ ສັນຕິສຸກ ອິນທະວົງ ລາຍການ 50 ແມັດ ຟຣີສະຕາຍ; ກີລາຢູໂດ 1 ຄົນ ທ້າວ ສຸກພະໄຊ ສິດທິສານ ຮຸ່ນນໍ້າໜັກ 60 ກິໂລ,
ໂອແລັມປິກ ລະດູຮ້ອນ ຂອງຄົນພິການຄັ້ງທີ 16 ຫຼື ພາຣາແລັມປິກປະກອບມີ ກີລາແລ່ນ-ລານ 1 ຄົນ ທ້າວ ແກ່ນ ເທບທິດາ ລາຍການແລ່ນ 100 ແມັດ (ພິການສາຍຕາ ລະດັບ T13), ສະເພາະກີລາແລ່ນ-ລານ ແລະ ລອຍນໍ້າ ແມ່ນໄດ້ສິດທິພິເສດເຂົ້າຮ່ວມຈາກໂອແລັມປິກສາກົນ, ສ່ວນກີລາຢູໂດ ແມ່ນຕ້ອງຜ່ານການແຂ່ງຂັນເກັບຄະແນນຄັດເລືອກລະດັບສາກົນ.
