ຄືທີ່ໄດ້ລາຍງານຂ່າວຢ່າງຕໍ່ເນື່ອງໃນແຕ່ລະວັນ ສະຖານະການໂຄວິດ-19 ຢູ່ປະເທດເຮົາ ການລະບາດໃນຊຸມຊົນໄດ້ຫຼຸດໜ້ອຍລົງ ແລະບໍ່ມີການລະບາດແລ້ວ ແຕ່ແຮງງານທີ່ກັບມາຈາກປະເທດໃກ້ຄຽງຍັງມີຫຼາຍ ແລະມີຜູ້ຕິດເຊື້ອຈຳນວນຫຼາຍໃນກຸ່ມນີ້ ໂດຍສະເພາະບັນດາແຂວງພາກໃຕ້ ເພື່ອເປັນການຊ່ວຍແບ່ງເບົາບັນແດາແຂວງເຫຼົ່ານັ້ນ ຄະນະສະເພາະກິດຂັ້ນສູນກາງໄດ້ມີທິດຊີ້ນຳໃຫ້ກະຊວງສາທາລະນະສຸກຮີບຮ້ອນຈັດກຳລັງຄົນ ແລະອຸປະກອນການແພດລົງຊ່ວຍເຫຼືອຢ່າງໄວທີ່ສຸດ.
ຕາມການປະຊຸມໃນຕອນເຊົ້າ ວັນທີ 23 ກໍລະກົດ 2021 ທີ່ສຳນັກງານນາຍົກລັດຖະມົນຕີ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ຂັ້ນສູນກາງ ໄດ້ປະຊຸມທາງໄກ (Video Conference) ຮ່ວມກັບຄະນະສະເພາະກິດບັນດາແຂວງ ແລະ ນະຄອນຫຼວງວຽງຈັນ, ໂດຍການເປັນປະທານ ຂອງທ່ານ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບ ຄຸມ ແລະ ແກ້ໄຂ ການແຜ່ລະບາດ ຂອງພະຍາດ COVID-19.
ທີ່ປະຊຸມແມ່ນໄດ້ມີຄຳເຫັນເນັ້ນໜັກ ໃຫ້ຄະນະສະເພາະກິດ ນະຄອນຫຼວງວຽງຈັນ ແລະ ບັນດາແຂວງ ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ສືບຕໍ່ເພີ່ມທະວີຄວາມຮັບຜິດຊອບຂອງຕົນ ຢ່າງສຸດຂີດ, ຮັບປະກັນໃຫ້ທິດຊີ້ນຳລວມສູນ, ເສີມຂະຫຍາຍຫົວຄິດປະດິດສ້າງ ແລະ ທ່າແຮງຂອງທ້ອງຖິ່ນ ໃຫ້ແທດເໝາະ ກັບສະພາບຕົວຈິງ ໃນການສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຢ່າງເຂັ້ມງວດ ແລະ ໄດ້ຮັບຜົນດີ.
