ກໍາປູເຈຍ ມອບວັກຊິນຊີໂນແວັກ 5 ແສນໂດສ, ລົດຂົນສົ່ງວັກຊິນ 3 ຄັນ ໃຫ້ ສປປ ລາວ
ລັດຖະບານ ແລະ ປະຊາຊົນ ແຫ່ງຣາຊະອານາຈັກກໍາປູເຈຍ ໄດ້ມອບວັກຊິນຊີໂນແວັກ (Sinovac) ຈໍານວນ 5 ແສນໂດສ
ແລະ ລົດຂົນສົ່ງວັກຊິນ ຈຳນວນ 3 ຄັນ ໃຫ້ແກ່ ລັດຖະບານ ແລະ ປະຊາຊົນລາວ ເພື່ອນໍາໃຊ້ເຂົ້າໃນການຕ້ານ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.
ພິທີມອບ-ຮັບ ໄດ້ມີຂຶ້ນໃນວັນທີ 3 ທັນວາ ນີ້ ທີ່ດ່ານຊາຍແດນສາກົນ ໜອງນົກຂຽນ-ຕຣາປຽກຣຽນ. ຕາງໜ້າໃຫ້ແກ່ລັດຖະບານ ແຫ່ງ ຣາຊະອານາຈັກກໍາປູເຈຍ ກ່າວມອບໂດຍ ທ່ານ ມອມ ບຸນເຮັງ ລັດຖະມົນຕີກະຊວງສາທາລະນະສຸກ ແລະ ຕາງໜ້າໃຫ້ແກ່ລັດຖະບານ ແຫ່ງ ສປປ ລາວ ກ່າວຮັບໂດຍທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ.
ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຂັ້ນສູນກາງ, ພ້ອມດ້ວຍຄະນະນໍາ ທີ່ມາຈາກ ສູນກາງ ແລະ ທ້ອງຖິ່ນຂອງທັງສອງຝ່າຍ.
ທີ່ມາ.ປະຊາຊົນ
